இந்த சரீர ஆத்ம சம்பந்தம் அநாதியானது; எக்காலத்திலும் உள்ளது. சிருஷ்டிக்கு முன்னும் ஸூக்ஷ்மமாய் (கண்ணுக்குத் தெரியாததாய்) நுண்ணியதாய் தமஸில் அடங்கியிருக்கும் காலத்திலும் அவைகள் உடலாய், தான் ஆத்மாவாய், அவைகளில் பகவான் இருக்கிறான்; அந்த ஸூக்ஷ்ம அசித், ஸ்தூலமாகி (கண்ணுக்குத் தோன்றி) பெயர், வடிவம் பெற்றிருந்தும் படைப்புக் காலத்திலும் அவைகளில் ஆத்மாவாகயிருந்து அவைகளைத் தனக்குச் சரீரமாகக் கொண்டிருக்கிறான். அசித்துக்கே (அதாவது அறிவில்லாத அசேதனப் பொருள்களுக்கே) ஸூக்ஷ்மமாயும் ஸ்தூலமாயும் மாறும் தன்மை உண்டு. ஜீவாத்மாக்களுக்கும், பகவானுக்கும் இவ்வித மாறுதல் கிடையாது.