அர்ஜுன! நீ அறிய வேண்டியவை இன்னும் பல உண்டு; முக்கியமாக நீ அறிய வேண்டியது யாதெனில், பிரளய காலத்தில் எல்லா சித் அசித்துக்களும் பெயர் வடிவங்களை இழந்து தமஸ்ஸில் ஒன்றி, நுட்பமாய் என்னிடம் அடங்கியிருக்கின்றன. அக்காலத்திலும் நான் அவைகளில் பரந்திருக்கிறேன். சிருஷ்டிகாலம் வந்ததும் அவைகளை மறுபடியும் முன் போலவே என் ஸங்கல்பத்தினாலே, பெயர் வடிவங்களுடன் படைக்கிறேன். இந்த ஸ்தூல சரீரங்களிலும் (பருஉடலிலும்) நான் அவைகளில் பரந்திருக்கிறேன். இப்படி எல்லாக் காலத்திலும் நான் அவைகளில் ஆத்மாவாயிருந்து, அவைகளை தரித்து, நியமித்து நடத்திப் போருகிறேன்; இப்படி என்னால் ஆளப்படும் எல்லாப் பொருள்களும் என் விபூதி; என் சொத்து. என் விபூதியில் சேராத வஸ்து எக்காலத்திலும் எவ்விடத்திலும் எதுவுமில்லை என்பதை நீ அறிவாயாக என்கிறான் கண்ணன்.